Лапорта: Сакаат да ни го уништат клубот, ама нема да можат!

January 14, 2025 | Kristijan Trajchov | Свет

Претседателот на Барселона, Жоан Лапорта, упати остри критики кон оние кои, според него, се обидуваат да му наштетат на клубот. „Не успеаја во тоа што го планираа. Покажавме сила и решителност. Се обидоа да не уништат и дестабилизираат, но членовите на Барселона сфатија дека ова е напад врз единството на клубот. Кампањите кои имаат за цел да не дискредитираат нема да не спречат да бидеме клуб кој го сакаат милиони ширум светот. Навикнат сум на критики, тоа е дел од мојот живот. Барселона има светла иднина“, изјави Лапорта. Тој истакна дека клубот се движи во вистинската насока, наведувајќи конкретни успеси. „Потпишавме голем договор со Најк. Новиот стадион ќе обезбеди стабилни приходи уште многу години. Ова не е само реновирање на Камп Ноу – тоа е комплетно нов стадион. Имаме силен тим со домашни играчи, дополнет со странски засилувања, и исклучителен тренер во Ханси Флик. Во последните четири години се фокусиравме на зголемување на приходите, намалување на трошоците и платите, економско закрепнување и зачувување на сопственичкиот модел на клубот. Сето тоа го постигнавме“, додаде тој. Лапорта нагласи дека Барселона е отпорна на обидите за дестабилизација. „Полни сме со енергија по она што се случи неодамна. Се обидоа да не дестабилизираат во клучен момент од историјата, но имаме тим кој веќе ги исполнува соништата и ќе продолжи да ни носи радост“, рече Лапорта. Барселона во неделата го освои шпанскиот Суперкуп, победувајќи го Реал Мадрид со 5:2 во финалето.

Не е дозволено копирање и користење на содржините без да бидат исполнети
Условите за користење на содржините.