“Перез ми кажа дека морам да го решам проблемот со судиите, инаку ќе бара англиски судии во Ла Лига!“

January 29, 2025 | Kristijan Trajchov | Свет

Новото раководство на Фудбалската федерација на Шпанија веќе предизвикува реакции во јавноста, а нејзиниот претседател, Рафаел Лузан, во најновото интервју дополнително ја разгоре дебатата. Лузан, кој е познат како фан на Реал Мадрид, откри дека претседателот на „кралскиот клуб“, Флорентино Перез, му се пожалил за арбитражата и начинот на кој судиите го третираат тимот. „Флорентино ми кажа дека морам да го решам проблемот со судиите. Ми рече дека Реал Мадрид загубил неколку трофеи поради арбитражата и дека не е задоволен од нивната работа. Мојот однос со него е коректен, но тој беше категоричен кога тврдеше дека клубот бил оштетен,“ изјави Лузан. Тој додаде дека, како нов претседател, допрва влегува во оваа проблематика и дека не може да преземе конкретни чекори веднаш. Сепак, Перез инсистирал на решавање на случајот „Негреира“ и дури предложил можност за воведување судии од Англија. „Јас му посочив дека ова не е во моја надлежност, но тој беше упорен дека треба да се најде решение. Дури и посочи дека ќе бара судии од Англија,“ истакна Лузан. Изјавите на новиот претседател сигурно ќе предизвикаат бурни реакции во фудбалската заедница, а останува да се види како ќе се развиваат настаните во шпанскиот фудбал.

Не е дозволено копирање и користење на содржините без да бидат исполнети
Условите за користење на содржините.