Консеисао: Дојдов во Милан за да ја освојам ЛШ

March 25, 2025 | Kristijan Trajchov | Свет

Тренерот на Милан, Серхио Консеисао, откри дека неговата одлука да го преземе кормилото на „росонерите“ била водена од амбицијата да ја освои Лигата на шампионите. Сепак, Португалецот не крие дека се соочува со предизвици, меѓу кои и континуираните шпекулации за неговата иднина. Консеисао пристигна во Милан на крајот на минатата година, заменувајќи го Пауло Фонсека, кој на клупата мина само пет месеци. Дебито му беше импресивно – Милан веднаш го освои Суперкупот на Италија, што внесе оптимизам меѓу навивачите. „Одлучив да дојдам во еден од најсилните шампионати во светот, со јасна цел – да ја донесам Лигата на шампионите во Милан. Бев свесен дека нема да биде лесно, но не ја составив оваа екипа и немав доволно време да ги подготвам играчите според мојата визија. Девет натпревари за 30 дена значат речиси никакви тренинзи, а тоа значително го отежнува процесот. Освоивме трофеј, но по ремито со Каљари, секој ден слушам ново име како моја потенцијална замена“, изјави Консеисао. И покрај притисокот, Португалецот останува фокусиран на својата мисија – да го врати Милан на европскиот трон. Сепак, времето ќе покаже дали ќе му биде дадена вистинска шанса да ја реализира својата визија.

Не е дозволено копирање и користење на содржините без да бидат исполнети
Условите за користење на содржините.