ОФИЦИЈАЛНО: Бразил го отпушти селекторот Доривал!

March 28, 2025 | Kristijan Trajchov | Свет

Бразил го отпушти главниот селектор Доривал Жуниор, соопшти Фудбалската конфедерација на Бразил, откако петкратниот светски шампион доживеа понижувачки пораз од 4-1 против големиот ривал Аргентина во квалификациски меч во Буенос Аирес. 62-годишниот стратег беше назначен во јануари 2024 година, откако репрезентацијата помина една година под водство на два привремени селектори, бидејќи Бразилската фудбалска федерација не успеа да го привлече Италијанецот Карло Анчелоти од Реал Мадрид. „Фудбалската конфедерација на Бразил информира дека селекторот Доривал Жуниор повеќе не е на чело на бразилската репрезентација“, стои во официјалното соопштение на CBF. „Раководството му се заблагодарува на Доривал и му посакува успех во понатамошната кариера... CBF ќе работи на пронаоѓање на негов заменик“, се додава во соопштението. Доривал ја презеде функцијата по успехот со Фламенго во 2022 година, каде што ги освои Копа Либертадорес и Бразилскиот куп – трофеј кој повторно го подигна наредната година со Сао Пауло. Сепак, тој никогаш не успеа целосно да ја преземе контролата врз репрезентацијата, а неговите скромни резултати (седум победи во 16 натпревари) не беа доволни за да ја добие довербата на бразилските навивачи, познати по своите високи очекувања.

Не е дозволено копирање и користење на содржините без да бидат исполнети
Условите за користење на содржините.