Се спрема ремонт во Барселона: Заминуваат шест фудбалери

May 20, 2025 | Kristijan Trajchov | Свет

Каталонскиот гигант Барселона се подготвува за сериозна летна реконструкција, при што дури шест фудбалери се наоѓаат на списокот за заминување. Според извори блиски до клубот, Ансу Фати, Роналд Араухо, Пау Виктор, Андреас Кристенсен, Ерик Гарсија и Пабло Торe би можеле да ја напуштат „Камп Ноу“ ова лето. Целта на раководството е јасна – да се ослободи платниот список и да се создаде простор за нови засилувања, сè во рамки на строгите правила за финансиски фер-плеј што ги спроведува Ла Лига. Барса сака да биде агилна на трансфер-пазарот без дополнителен финансиски товар. Меѓу имињата, најмалку дилеми има околу Ансу Фати. И покрај огромниот потенцијал што го покажа на почетокот на својата кариера, напаѓачот не ги оправда очекувањата, а клубот е решен да ја заврши оваа епизода и да го продаде што поскоро. Ситуацијата со Роналд Араухо е поинаква – Барса ќе го пушти само доколку пристигне голема понуда од врвен европски клуб. Сличен став има и за Ерик Гарсија, кој одигра добра завршница на сезоната, па трансфер би се разгледувал само при финансиски примамлива понуда. Андреас Кристенсен, пак, би можел да замине само ако клубот успее да го донесе Џонатан Тах од Баер Леверкузен, кој е еден од приоритетите на спортскиот директор Деко. Во спротивно, Данецот ќе остане како дел од одбранбената ротација. Младиот Пабло Торе е речиси сигурен за заминување. Клубот повеќе преферира трајна продажба со можност за откуп, отколку нова позајмица. Интерес за него веќе покажале Виљареал и Реал Сосиедад. Барселона се надева дека преку овие трансфери ќе обезбеди финансиска стабилност и ќе го постави темелот за конкурентна екипа во новата сезона.

Не е дозволено копирање и користење на содржините без да бидат исполнети
Условите за користење на содржините.