Премиерлигашите одлучија: ВАР ќе има и следната сезона

June 6, 2024 | Kristijan Trajchov | Свет

Денеска и официјално тимовите од Премиерлигата одлучија ВАР технологијата да постои и следната сезона па така предлогот на Вулверхемптон за укинување на ВАР системот во Премиерлигата не е прифатен. Дури 19 тимови гласаа оваа технологија да постои и наредната сезона.

Во соопштението на Премер лигата стои: „Клубовите од Премиер лигата денеска гласаа за продолжување на функционирањето на ВАР во Премиер лигата. Иако ВАР произведува попрецизно одлучување, беше договорено дека треба да се направат подобрувања во корист на играта и навивачите. Како дел од темелните дискусии на Годишното генерално собрание, беше договорено дека ПГМОЛ, Премиер лигата и клубовите сите имаат важна улога во подобрувањето на системот и неговата репутација“.

Факт е дека самата идеја за ВАР технологија е добра и целата идеја е да бидат спречени што е можно помалку грешки, но имплементацијата на оваа идеја е дискутабилна бидејќи оваа сезона одлуките кои беа носени од одговорните лица од ВАР беа на штета на многу клубови од Премиерлигата каде во одредени ситуации имаше и извинувањето од Премиерлигата спрема оштетените клубови.

Беа наведени и шест заклучоци кои треба да бидат имплементирани следната сезона за подобрување на ВАР одлуките а тие се однесуваат на:

-Одржување на висок праг за ВАР интервенција за да се обезбеди поголема конзистентност и помалку прекини во текот на играта.

-Намалување на доцнењето на играта, првенствено преку воведување на полуавтоматизирана офсајд технологија (SAOT).

-Подобрување на искуството за навивачите преку намалување на доцнењата, најави на стадионот од судиите по промена на одлуката по ВАР и каде што е можно, зголемена понуда на повторувања на големиот екран за да ги вклучи сите во интервенциите на ВАР.

-Подобра ВАР обука за да се подобри конзистентноста, вклучувајќи акцент на брзината на процесот.

-Зголемување на транспарентноста и комуникацијата околу ВАР – вклучително и проширени комуникации од Центарот за натпревари во Премиер лигата и преку емитување програми, како што е „Match Officials Mic’d Up“.

-Испорака на ВАР комуникациска кампања за навивачите и засегнатите страни, која ќе се обиде дополнително да ја разјасни улогата на ВАР во играта.

Значи, тимовите од Премиерлигата бараат константност во носењето на одлуките и штетите спрема клубовите да бидат доведени до минимално ниво.

Не е дозволено копирање и користење на содржините без да бидат исполнети
Условите за користење на содржините.