Башкими ја совлада Беса и ќе игра Прва лига! (ВИДЕО)

May 25, 2025 | Kristijan Trajchov | Македонија

Екипата на Башкими од Куманово успеа да избори пласман во Првата македонска фудбалска лига откако денеска во бараж натпреварот ја совлада Беса со 0-2. Со овој триумф, клубот се враќа во елитното друштво и официјално го пополнува последното место во Првата лига за сезоната 2024/25. На натпреварот што се одигра пред солидна публика, Башкими демонстрираше зрелост и решителност. Првиот гол го постигна Сахити во 37. минута, по одлично изведена контра-акција, што им донесе предност пред паузата. Крајниот резултат го постави Алексовски околу десет минути пред крајот на натпреварот, со што беше потврден успехот на кумановскиот состав. Баражот беше последна шанса за Беса да остане меѓу најдобрите, но откако претходно екипите на Воска Спорт и Гостивар беа административно исфрлени од лигата, тетовскиот клуб останува единствениот кој испаѓа поради резултати на терен. Башкими како третопласирана екипа од Втората лига ја искористи можноста и по одличната сезона ја круниса со враќање во Првата лига – успех кој со нетрпение ќе се слави во Куманово.

Не е дозволено копирање и користење на содржините без да бидат исполнети
Условите за користење на содржините.