Македонија замина за Прага – утре пријателски меч со Саудиска Арабија

September 3, 2025 | Kristijan Trajchov | Македонија

Репрезентативците на Македонија претпладнево отпатуваа за Прага, каде што утре ќе го одиграат пријателскиот натпревар против селекцијата на Саудиска Арабија. Тие се собраа во понеделникот, а веќе попладнево ќе го одработат првиот тренинг на стадионот „Викторија“ во чешката престолнина – арената на која ќе се сретнат со азискиот ривал. Ова ќе биде трет дуел меѓу Македонија и Саудиска Арабија. Првиот се одигра во Ријад на 1 август 2001 година и заврши без победник (1-1). Вториот беше на 22 октомври 2022 во Абу Даби, кога Саудијците славеа со минимални 1-0. Мечот во Прага ќе биде вистинска генерална проба за избраниците на селекторот пред многу поважниот дуел – квалификацискиот натпревар за СП 2026 против Лихтенштајн, кој ќе се игра в недела на „Тоше Проески“ во Скопје. Македонија ќе се обиде преку овој пријателски натпревар да ја подобри формата, да ги воигра новите сили во тимот и со позитивна енергија да влезе во квалификацискиот предизвик.

Не е дозволено копирање и користење на содржините без да бидат исполнети
Условите за користење на содржините.