Силекс одигра реми против Тиквеш и направи чекор назад во битката за титулата (ВИДЕО)

March 31, 2025 | Kristijan Trajchov | Македонија

Силекс не успеа да ја оправда улогата на фаворит и во драматичен дуел со Тиквеш мораше да се задоволи со реми (1-1) во рамките на 25. коло од Првата македонска фудбалска лига. Натпреварот започна со претпазлива игра, а домашните од првата минута ја презедоа иницијативата, обидувајќи се да ја пробијат цврстата одбрана на кавадарчани. Тиквеш, иако во неколку наврати изгледаше несигурно во дефанзивата, успеа да одолее на притисокот, па дури и за малку ќе си постигнеше автогол во првиот дел од првото полувреме. Но, како што често знае да биде во фудбалот, тимот кој беше потиснат, прв стигна до водство. Александар Мишов доби совршено прецизна топка и со мајсторски удар ја закачи пречката, пред топката да заврши зад грбот на Џеков, носејќи огромно изненадување и водство за Тиквеш во 31. минута. Домашните не чекаа долго да возвратат. Со засилен напад, Силекс брзо го пронајде својот одговор. Само четири минути подоцна, Дарко Додев со фантастичен удар ја затресе мрежата на гостите, враќајќи ја радоста на трибините и носејќи израмнување (1-1). Второто полувреме започна со поголема агресија од двете страни, но најголемата битка се водеше на средината од теренот. Тиквеш не се задоволи со ремито и се обидуваше да се закани преку брзи контранапади. Во 68. минута, гостите постигнаа уште еден гол, но истиот веднаш беше поништен поради офсајд. Во последните 15 минути Силекс жестоко протестираше барајќи пенал по дуелот во шеснаесетникот, но судијата остана цврст во својата одлука и наместо најстрога казна, Додев доби жолт картон за симулација. Во последните моменти од натпреварот, кратовци вршеа силен притисок, создавајќи неколку добри шанси, но конечниот резултат остана непроменет. Со ова реми, Тиквеш ја продолжува својата борба за опстанок со 22 освоени бода, додека Силекс направи чекор наназад во битката за титулата, сега има 49 бодови, четири помалку од лидерот Шкендија.

Не е дозволено копирање и користење на содржините без да бидат исполнети
Условите за користење на содржините.