Стојановски: Ја чувавме енергијата во вториот дел

June 9, 2025 | Kristijan Trajchov | Македонија

Македонската фудбалска репрезентација денеска запиша исклучително значајна победа во квалификациите за Светското првенство, совладувајќи ја селекцијата на Казахстан со минимални 0-1 на гостински терен во Астана. Стрелец на единствениот гол беше искусниот Александар Трајковски, кој во 33. минута го казни домаќинот по една дефанзивна грешка. Поради суспензијата на селекторот Благоја Милевски, националниот тим го предводеше неговиот прв асистент Роберт Стојановски, кој успешно ја водеше репрезентацијата до нови три бода. „Одигравме две различни полувремиња. Знаевме во каква состојба се играчите по интензивниот меч со Белгија. Затоа второто полувреме го планиравме да го одиграме позатворено, во втората зона, со цел да ја зачуваме енергијата“, изјави Стојановски по натпреварот. „Казахстан одигра добро во вториот дел, но ние имавме контрола над мечот и ги неутрализиравме нивните клучни играчи. Не секогаш победуваш со добра игра – денес победивме со тактичка дисциплина.“ По четири одиграни кола, Македонија е непоразена и со осум освоени бодови го зазема првото место во групата Ј, со бод повеќе од Велс. Со оваа победа, репрезентацијата направи сериозен чекор напред кон пласман на Светското првенство и дополнително ја зацврсти атмосферата во тимот.

Не е дозволено копирање и користење на содржините без да бидат исполнети
Условите за користење на содржините.