Вардар и Струга на чекор од финалето во Купот на Македонија

April 9, 2025 | Kristijan Trajchov | Македонија

Полуфиналните дуели од Купот на Македонија стартуваа возбудливо, а по првите натпревари веќе се наѕира и можниот финалист. Екипата на Вардар го направи првиот сериозен чекор кон големото финале со убедлива победа над Брера Струмица. Црвено-црните уште еднаш ја потврдија својата доминација и како и за време на викендот, немаа поголеми проблеми со противникот, славејќи со сигурни 3:0. Со оваа резултатска предност, Вардар е речиси сигурен патник во финалето, освен ако не се случи вистинско чудо. Натпреварот го отвори Сењор, кој стрелаше по една дискутабилна ситуација, носејќи им водство на скопјани. До крајот на првото полувреме, Матиќ го зголеми водството на 2:0. Во второто полувреме, Закариќ стави печат со трет гол, поставувајќи го конечниот резултат. На другата страна, Шкендија не успеа да ја искористи предноста на домашен терен и загуби од актуелниот шампион Струга, иако имаше рана предност. Рамадани постигна гол директно од корнер, но гостите не се предадоа и со головите на Укпа и Радески направија пресврт за триумф. Реванш натпреварите од полуфиналето ќе се играат на 23 април и ќе одлучат кои два тима ќе се соочат во борбата за трофејот.

Не е дозволено копирање и користење на содржините без да бидат исполнети
Условите за користење на содржините.