Хумелс реши да се пензионира на крајот од оваа сезона!

April 4, 2025 | Kristijan Trajchov | Свет

По скоро две децении на врвен фудбал и безброј незаборавни моменти, германскиот стопер Матс Хумелс реши да го затвори поглавјето наречено професионална кариера. Како што самиот призна „доаѓа мигот кој секој фудбалер го доживува, но никој не е подготвен да го прифати лесно“. Во дресот на Рома, каде пристигна како искусен ветеран по разделбата со Борусија Дортмунд, Хумелс ја игра својата последна сезона. Потпиша договор на само една година и уште од самиот почеток делуваше како да си подарува една последна приказна пред завесата да се спушти. „Се борам со емоциите... 18 години фудбал – љубов, страст, победи, порази, и сè меѓу нив. Сега е време да кажам збогум,“ соопшти 36-годишниот дефанзивец, оставувајќи многумина со грутка во грлото. Неговото фудбалско патешествие е блескаво: настапи за германските гиганти Баерн Минхен и Борусија Дортмунд, освои пет титули во Бундеслигата, три Купа на Германија, двапати стигна до финале на Лигата на шампионите (иако без среќен крај), а како круна на репрезентативната кариера – триумфот со Германија на Светското првенство во 2014 година. Со 78 настапи и пет голови за „Маншафт“, и безброј клучни интервенции на теренот, Хумелс останува запишан како фудбалер со интелигенција, стабилност и стил. Кога ќе ги соблече копачките, ќе остане еден од последните класични стопери од „старата школа“ – човек што играше со срце, но и со глава.

Не е дозволено копирање и користење на содржините без да бидат исполнети
Условите за користење на содржините.