Јунајтед добива квалитетен напаѓач: Ќе се активира откупната клаузула од 62 милиони фунти

May 20, 2025 | Kristijan Trajchov | Свет

Во сенка на една од најлошите сезони во Премиер лигата во поновата историја, Манчестер Јунајтед се надева на спас и тоа во форма на европски трофеј. Финалето на Лига Европа во Билбао е пред вратите, но од „Олд Трафорд“ веќе пристигнуваат навестувања за нов почеток. Според реномираниот „Скај Спортс“, Јунајтед веќе ги договорил личните услови со напаѓачот на Вулверхемптон Матеус Куња. Иако „волците“ не сакаат да се разделат со својата најголема ѕвезда, англискиот гигант е подготвен да ја активира откупната клаузула од 62,5 милиони фунти за да го донесе Бразилецот во Манчестер. Куња оваа сезона блескаше во дресот на Вулверхемптон, постигнувајќи 15 голови на 31 натпревар во Премиер лигата. Со своите 25 години, се смета за играч во подем, а Јунајтед верува дека новиот стратег Рубен Аморим ќе знае како да го извлече максимумот од неговиот потенцијал. Новото лице во нападот доаѓа по разочарувачките настапи на Расмус Хојлунд и неконстантноста на Џошуа Зиркзе. Со ова засилување, „црвените ѓаволи“ испраќаат јасна порака: крај на експериментите, време е за сериозен фудбал. Сер Џим Ретклиф, кој веќе активно учествува во спортската политика на клубот, очигледно реши да му ја исполни првата желба на својот нов менаџер. А Куња би можел да биде само почетокот на летната револуција во Манчестер.

Не е дозволено копирање и користење на содржините без да бидат исполнети
Условите за користење на содржините.