Легендарниот судија би променил две фудбалски правила и тоа веднаш

March 27, 2025 | Kristijan Trajchov | Свет

Поранешниот судија на Премиер лигата, Марк Клатенбург, кој зад себе има 291 официјален натпревар во најсилното англиско првенство, предлага две храбри промени кои би можеле драстично да го трансформираат фудбалот. Како долгогодишен дел од елитното судење во Англија, а сега редовен колумнист и аналитичар, Клатенбург не се двоуми да ги посочи слабостите во играта. Во неодамнешно гостување во подкастот The Overlap со Пол Сколс и Џејми Карагер, тој ги откри своите идеи за побрз и подинамичен фудбал. „Фудбалот треба да биде спектакл, а не место за бескрајно одолговлекување. Замислете, натпреварот трае 90 минути, а во Лигата на шампионите некогаш имавме само 40 минути вистинска игра. Тоа мора да се промени!“, истакна Клатенбург. Првата новина што ја предлага е доделување корнер ако голманот ја задржи топката предолго, надминувајќи осум секунди. Според него, ова би спречило одолговлекување и би го зголемило темпото на играта. Втората идеја е уште порадикална: наместо судиите да покажуваат жолти картони за играчите што намерно одолговлекуваат аут, судијата би можел директно да му го додели аутот на противничкиот тим. „Ова би ги принудило фудбалерите да играат побрзо, без непотребни трикови и задржувања. На крајот на денот, гледачите сакаат акција, а не прекини“, додаде Клатенбург.

Не е дозволено копирање и користење на содржините без да бидат исполнети
Условите за користење на содржините.