Ливерпул стапил во контакт со менаџерите на Исак

March 19, 2025 | Kristijan Trajchov | Свет

Ливерпул веќе воспоставил контакт со агентите на Александар Исак, шведскиот напаѓач кој се споменува како потенцијално засилување за „црвените“, пренесува познатиот трансфер експерт Фабрицио Романо. Летниот преоден рок на „Енфилд“ се очекува да биде исклучително возбудлив, особено што новиот стратег Арне Слот ги одредил приоритетите за засилување, а најголемо внимание се посветува на офанзивната линија. Со неизвесната иднина на Мохамед Салах, како и се погласните шпекулации за можни заминувања на Луис Дијаз и Дарвин Нуњез, Ливерпул бара нови опции во нападот. Меѓу имињата што се поврзуваат со клубот е и Исак, но засега „црвените“ не испратиле официјална понуда. Шведскиот напаѓач пристигна во Њукасл од Реал Сосиедад во август 2022 година за 63 милиони евра и досега има постигнато 58 гола на 100 натпревари. Тој беше стрелец и во финалето на Лига купот, каде што Њукасл славеше со 2:1 токму против Ливерпул.

Не е дозволено копирање и користење на содржините без да бидат исполнети
Условите за користење на содржините.