Македонскиот талент Љатифи ја продолжува кариерата во Хрватска

August 13, 2025 | Kristijan Trajchov | Свет

Македонскиот талент Љатифи ја продолжува кариерата во Хрватска

Талентираниот македонски фудбалер Адмир Љатифи ќе ја продолжи кариерата во редовите на хрватскиот прволигаш Осијек, отворајќи ново поглавје во својата млада, но веќе импресивна кариера. Само на 18-годишна возраст, Љатифи веќе има 41 настап во Првата македонска фудбалска лига, настапувајќи за Беса и Македонија Ѓорче Петров. Иако неговата природна позиција е на крилните линии, тој умее подеднакво креативно да делува и зад напаѓачите, што го прави разновиден и корисен играч за секој тим. Фудбалските чекори ги направи во школата на Њу Старс, каде го привлече вниманието со својата брзина и техничка умешност. Во 2022 година се пресели во редовите на „лавовите“ од Ѓорче Петров, а по распадот на Беса, неговиот потенцијал го забележа Осијек и му понуди ангажман. Сега останува да се види дали тренерскиот тим на Осијек ќе му даде веднаш шанса во првиот состав или ќе го вклучи во младинската екипа, каде би можел да се адаптира на новата средина и да стекне дополнително искуство во хрватскиот фудбал. Љатифи во моментов е активен и на репрезентативен план, носејќи го дресот на младинската селекција на Македонија до 19 години. За него ова е прв интернационален предизвик и голема можност да направи нов исчекор во кариерата.

Не е дозволено копирање и користење на содржините без да бидат исполнети
Условите за користење на содржините.