Нов кикс и шок за „кралевите“ поради црвениот картон на Белингем (ВИДЕО)

February 15, 2025 | Kristijan Trajchov | Свет

Осасуна и Реал Мадрид одиграа нерешено 1-1 на „Ел Садар“ во рамките на 24. коло од шпанската Примера, во натпревар кој предизвика многу реакции поради спорните одлуки на главниот судија Хозе Мунуера. Гостите од Мадрид имаа подобар почеток и поведоа уште во 15. минута, кога Килиан Мбапе ја затресе мрежата по одлична асистенција на Федерико Валверде. Сепак, крајот на првото полувреме донесе голем удар за „кралевите“ – Џуд Белингем доби директен црвен картон по жесток приговор кон судијата, оставајќи го Реал со играч помалку. Во вториот дел, Осасуна изврши притисок, а во 55. минута Едуардо Камавинга невнимателно згазна противник во шеснаесетникот. По ВАР проверка, беше досуден пенал, што Анте Будимир го претвори во израмнувачки погодок во 58. минута. И покрај обидите на Реал да дојде до победа со играч помалку, Осасуна одолеа и го задржа резултатот 1-1, што воопшто не му одговара на лидерот во борбата за титулата. Ова реми им отвори можност на Атлетико Мадрид и Барселона да го намалат бодовниот заостаток на табелата.