„Олд Трафорд“ заминува во историјата, ќе се изгради нов ултрамодерен стадион

March 11, 2025 | Kristijan Trajchov | Свет

Манчестер Јунајтед планира амбициозен проект за изградба на нов модерен стадион со капацитет од 100.000 гледачи, што би значело дека легендарниот „Олд Трафорд“ би бил срушен. Зад овој проект, вреден 2 милијарди фунти, стои ко-сопственикот на клубот, сер Џим Ретклиф, кој има визија да создаде „Вембли на северот“. Владата го поддржува планот, кој треба да донесе значителен економски развој во регионот, а освен стадионот, предвидена е и урбана трансформација со изградба на нови станбени и деловни комплекси, како и подобрување на инфраструктурата. Работната група, предводена од лорд Себастијан Коу и градоначалникот на Манчестер, Енди Бурнам, веќе работи на деталите. Според експертите, изградбата може да трае до седум години, а новиот стадион би можел да биде завршен околу 2032 година. Сепак, раководството на клубот сè уште ја разгледува и можноста за реновирање на „Олд Трафорд“ и проширување на капацитетот на 87.000 седишта. Очекувањата се дека конечната одлука ќе биде донесена до крајот на оваа сезона. Ако проектот се реализира, Манчестер Јунајтед ќе го добие најголемиот стадион во Обединетото Кралство, кој ќе го надмине и прочуениот „Вембли“ во Лондон.

Не е дозволено копирање и користење на содржините без да бидат исполнети
Условите за користење на содржините.