Реал се поуверен дека ќе го потпише Арнолд, откриена и должината на договорот

December 20, 2024 | Kristijan Trajchov | Свет

Според информациите на „Caught Offside“, Реал Мадрид е сè попозитивен во својата намера да го ангажира Трент Александер-Арнолд од Ливерпул следното лето, како слободен агент. Договорот на 26-годишниот фудбалер со Ливерпул истекува на крајот од сезоната, а засега не се појавуваат значителни напредувања во преговорите за продолжување на соработката. Навивачите на Ливерпул се загрижени, бидејќи десниот бек, како и Вирџил ван Дајк и Мохамед Салах, влегуваат во последните шест месеци од своите договори и ќе можат да започнат преговори со било кој клуб за трансфер следното лето, започнувајќи од јануари. „Caught Offside“ известува дека извори блиски до Реал Мадрид им соопштиле дека раководството на клубот е „се пооптимистично“ во намерата да го убеди Александер-Арнолд да се приклучи на својот репрезентативен соиграч, Џуде Белингем, во тимот на „белите“ следната сезона. Наводно и Ливерпул и Реал Мадрид му понудиле на дефанзивецот четиригодишни договори со можност за петта година. Но, со секој изминат ден, ризикот дека Ливерпул може да го изгуби Александер-Арнолд без никаков надоместок расте. Меѓутоа, фудбалерот бил јасен во текот на преговорите дека не сака да ги води преговорите во јавност, така што сè уште постои надеж, и покрај информациите што укажуваат на спротивното, дека тој ќе го продолжи својот престој на Анфилд.

Не е дозволено копирање и користење на содржините без да бидат исполнети
Условите за користење на содржините.