Ширер: Само еден тим во ПЛ може да го купи Исак

January 10, 2025 | Kristijan Trajchov | Свет

Правилата за профит и одржливост на фудбалските клубови значително ги ограничуваат англиските премиерлигаши кога станува збор за најголемите трансфери во светскиот фудбал. Во оваа насока, Алан Ширер смета дека во моментов само еден клуб од Англија може да си го дозволи Александер Исак. Швеѓанецот блеска во дресот на Њукасл и моментално важи за најдобар напаѓач во Премиер лигата. Неговиот статус и извонредната форма ја зголемија неговата пазарна вредност на неверојатни 150 милиони фунти. Оваа сума, која Њукасл ја испраќа како порака преку најблиските медиуми, служи како предупредување до сите големи клубови кои имаат намера да го донесат Исак во своите редови. „Освен Челси, не гледам кој друг клуб може да си го дозволи Исак во овој момент. Правилата за профит и одржливост се доста строги, и тоа ги прави работите уште покомплицирани. Не велам дека тие правила се добри или лоши, но јас не сум тој кој треба да одредува како Њукасл го проценува својот играч“, вели Ширер. Според него, прашањето не е само дали клубовите можат да платат 150 милиони фунти, туку и што би направиле со тие пари ако го продадат Исак. „Во моментов, секој би сакал да има играч како Исак,“ додаде Ширер.

Не е дозволено копирање и користење на содржините без да бидат исполнети
Условите за користење на содржините.