Тебас со тајни документи го разубедил Вилијамс да ја одбие Барселона

July 8, 2025 | Kristijan Trajchov | Свет

Тебас со тајни документи го разубедил Вилијамс да ја одбие Барселона

Мигел Галан, шпански спортски функционер, обелодени нови детали за заткулисната средба меѓу претседателот на Ла Лига, Хавиер Тебас, и раководството на Атлетик Билбао, кои сериозно влијаеле на потенцијалниот трансфер на Нико Вилијамс во Барселона. Како што изјави Галан, на тој состанок Тебас лично му презентирал на претседателот на Атлетик привремени финансиски извештаи на Барселона, преку кои можело директно да се види дека во добивките и загубите нема евидентирана никаква ставка поврзана со корпоративна продажба на ВИП-седишта – што укажува дека приходот од таа трансакција не постои или не е признаен. Покрај тоа, Тебас посочил дека Ла Лига драстично го намалила платниот лимит на Барселона (т.н. LCPD – лимит за плати и придонеси), а клубот нема останат буџет ниту можност да регистрира нови фудбалери, во согласност со правилата на финансиски фер-плеј. На состанокот бил презентиран и извештај од ограничена ревизија, потпишан од ревизорската куќа Crowe Auditores España SL, со кој се потврдува состојбата на каталонскиот клуб. Според доверливи информации до кои дошол Атлетик, Нико Вилијамс по овие сознанија побарал дополнителна гаранција – конкретно, ослободувачка клаузула во договорот. Барселона, како што наведува Галан, постапила рационално и не прифатила таков услов. Пропаѓањето на трансферот, според Галан, не се должи на желбата на Барселона или на играчот, туку исклучиво на недовербата која ја создал претседателот на Ла Лига кај менаџерот, самиот фудбалер и неговото семејство. Во завршниот дел од неговата изјава, Галан тврди дека Нико Вилијамс и неговото семејство добиле економски информации за Барселона кои биле намерно преувеличани со цел да се создаде страв и да се изнуди согласност за вклучување на ослободувачка клаузула – без оправдана основа.

Не е дозволено копирање и користење на содржините без да бидат исполнети
Условите за користење на содржините.