Винисиус со критика за поранешниот селектор на Бразил: Ако го заменеше Нејмар, немаше да испаднеме

May 16, 2025 | Kristijan Trajchov | Свет

Во новиот документарец на „Нетфликс“, посветен на животот и кариерата на Винисиус Жуниор, бразилската ѕвезда на Реал Мадрид за првпат отворено зборува за една од најболните епизоди во својата репрезентативна кариера – елиминацијата од Светското првенство во Катар 2022. Иако поминаа две години, Винисиус признава дека поразот од Хрватска во четвртфиналето сè уште го прогонува. „Размислувам за тој натпревар речиси секој ден“, вели тој во еден од најемотивните моменти од документарецот. Средбата во Доха заврши 1-1 по продолженијата, а Хрватите, предводени од блескавата форма на голманот Доминик Ливаковиќ, беа посигурни при изведувањето на пеналите и ја шокираа селекцијата на Бразил. Но, Винисиус верува дека мечот можел да заврши поинаку ако селекторот Тите реагирал подобро по водечкиот гол на Нејмар. „Требаше да го замени Нејмар и да внесе дефанзивец како Бремер. Со таа измена ќе ја заклучевме куќата. Ќе добиевме барем уште две минути, доволно да ја задржиме предноста и да победиме“, оценува Винисиус, обвинувајќи го Тите за тактичка наивност. Иронијата е што самиот Винисиус беше заменет уште во 64. минута каде место него влезе Родриго. Таа замена, како што се покажа, не беше доволна да ја спречи хрватската офанзива и драмата која го урна сонот на Бразилците за титула.

Не е дозволено копирање и користење на содржините без да бидат исполнети
Условите за користење на содржините.