Влаховиќ заминува од Јувентус, сака во Премиер лигата

January 28, 2025 | Kristijan Trajchov | Свет

Српскиот напаѓач Душан Влаховиќ нема да го продолжи договорот со Јувентус, објавува La Gazzetta dello Sport. По три години поминати во Торино, каде пристигна од Фиорентина за сума од 70 милиони евра, изгледа дека неговата авантура со „бјанконерите“ се ближи кон крајот. Иако неговиот договор важи до 2026 година, високиот годишен надомест од 10,5 милиони евра и амбицијата на Јувентус да заработи од трансферот го прават летниот преоден рок најреална опција за негово заминување, доколку не се случи изненадување до крајот на тековниот трансфер период. Сезоната за Влаховиќ беше исполнета со подеми и падови. Со 12 гола на 26 натпревари, статистиката е солидна, но минутажата не секогаш беше загарантирана. Во клучните дербија против Милан и Наполи, Влаховиќ започна на клупата, додека тренерот Тиаго Мота му даде предност на новајлијата Рандал Коло Муани, кој пристигна од ПСЖ. Неговата иднина изгледа насочена кон Премиерлигата, каде што интерес покажаа Челси и Манчестер Јунајтед. Претходно, Влаховиќ доби примамлива понуда од Саудиска Арабија, но јасно стави до знаење дека сака да остане во Европа и да продолжи да игра на највисоко ниво. До понеделник, Влаховиќ и Јувентус ќе мора да се обидат да коегзистираат, но изгледа дека разделбата е прашање на време. Летниот преоден рок, според сите најави, ќе биде клучен за неговото ново поглавје.

Не е дозволено копирање и користење на содржините без да бидат исполнети
Условите за користење на содржините.